124,笨唔笨先?

的士司機有幾巴閉?零二年港府企圖強行通過廿三條立法,當時的保安局局長葉劉淑儀曾經這樣回應李柱銘:

「咁技術性咁複雜既條文,香港七百萬巿民,有幾多人真係有興趣睇你個白紙草案呀!唔通話真係平時坐車果位的士司機、酒樓侍應、麥當勞既服務員會拎住來逐條同我辯論咩?」

結果佢落左台,不過就唔係因為歧視的士司機、酒樓侍應,同埋麥當勞既服務員。的士司機、酒樓侍應、麥當勞既服務員、同你、同我一樣,大家都唔係好巴閉,所以大家都俾人歧視緊。時不時就有D「作家」、「名人」寫「文章」也好,發表講話(又名吹水)也好,會忽然講幾句「的士司機如是說」,作為文章或講話既陪襯,一來表示自己既「親民」作風,雅俗兼備,二來又可以展示下自己既風趣幽默,仲有就係可以暗示下自己既消費能力。你好少聽果D人講:巴士司機今日同我講「......」吧?(行車時與巴士司機談話仲係犯法既!嘿嘿)。

話時話,今日坐的士,個的士司機又真係幾抵死(哪哪哪,仲唔係自打嘴巴?)。Well,吾既非「作家」,又非「名人」,搭的士都係為勢所逼+可以報銷(註:祖國用語,即出公數是也)所以well.....嘿嘿 講返正題,今日坐的士,個收音機播緊唔知咩台既時事鋒煙節目,先後有兩名聽眾打入來,兩個都先表示自己係「支持民主」既民主進步人士,之不過,佢地既理性話俾佢地聽(大概如此啦):「哪,泛民主派今次又來124搞搞震,反對政改,係犧牲左香港多數人既福祉,來換取個人政治上既利益,如選票。」兩人又不約而同地表明自己係「沉默既大多數」,對泛民主派一小撮人既言行非常不滿。好啦,到左廣告時間,的士司機哥哥出招啦:「啊車~又話自己係沉默既大多數,沉默既大多數就唔會打電話上電台講野啦。你話係唔係啦,查實香港人好精既,冇著數既野好少出來爭取,正所謂咩.....精人出口,笨人出手啊嘛。」

好啦,笨人們,冇著數架喔,哪撫心自問啦:驚唔驚俾人話你笨先?驚唔驚俾人話你係「死硬派」先??驚唔驚俾人話你無腦幫人抬轎俾人利用先???驚唔驚俾人話你係玩分化搞對立暴民政治犧牲左多數人既利益先????仲有,唔係行完就一天都光晒架喔!唔係有普選就有民主架喔!!唔係投左票就會經濟起飛人人長命百歲架喔!!!唔係行下街街,shopping shopping架喔!!!!有權利仲要有義務架喔!!!!!

哪,唔係搞對立玩分化,行唔行係你既自由。民主唔係非黑即白,唔係唱高調玩良心。笨人只係笨,所以唯有用行動來表達自己既「民意」。124,笨唔笨先?

3 comments

  1. 李智良 says:

    讚!
    據悉好多人「響應」遊行非為泛民號召,而是以人數捆綁泛民隨事轉軚的幾個人,那麼,有好些游行的人就是要抗議你講及的政治瓜分妥協的亂象。故然,一日未投票,無人能定斷,遊行彷佛是一種求安心的儀式了。

  2. Tale says:

    也許大家都抱著歲晚金多寶的心情哩,中左獎先算~嘿嘿

  3. Great article, I liked it very much congratulations!! 2392981

Leave a Reply

Your email address will not be published.